Nagdangop sa Sangguniang Panlungsod ang pila ka pumuluyo sang Barangay Banago agud magpadangat sang concerns batok sa plano sang negosyante nga si Jerry Sy nga reclamation sa 150 tubtob 168 hectares nga duta nga nasakupan sang Barangay.
Sa interview sang Bombo Radyo Bacolod kay Juvy Monticalbo, presidente sang Bacolod Fisherfolks Federation, sila ang nagpadala sang sulat sa Sangguniang Panlungsod nga nagapangayo sang bulig nga indi mapirmahan ang ginpadala nga Resolution of No Objection (RONO) sang negosyante.
Panindugan ni Monticalbo nga masobra linibo ang maapektuhan nga residente gikan lamang sa Purok Alalahoy sa nasambitan nga Barangay nga dugangan pa ang mga maapektuhan nga kaiping nga mga Barangay nga yara sa coastal areas.
Pahanumdom sini nga kalabanan sa mga pumuluyo ang mga mananagat ukon sa dagat nagikan ang palangitan-an.
Suno kay Monticalbo, kun madayun ang reclamation madula ang ila puluy-an kasubong man ang ila palangabuhian.
Paathag ini nga pagpangaman lamang ang ila nga pagpadangat sang concern sa Sangguniang Panlungsod kag dako nila nga pasalamatan kun sabton ang ila nga mga concerns partikular na ni Bacolod City Mayor Alfredo “Albee”Benitez.
Suno kay Monticalbo wala sila nagabalabag sa development sang ciudad apang ang luyag lamang nila nga maseguro ang ila puluy-an kag palangabuhian, bangod kalabanan sa ila ang nagakabuhi pinaagi sa kadagatan, gani mas pabor ang mga ini kun sila ang indi mapalayo diri.
Dugang pa sang mga ini nga ang ila nga sektor man ang nagahatag sang food supply sa ciudad, sa bahin sang seafoods.
Panawagan sang mga ini nga ila ang pahibaluon una sang mga developments bangod indi nila luyag nga makibot na lamang sila nga ginaguba na ang ila mga puluy-an bangod naaprubahan na ang reclamation program.
