Natingala ang mga pumuluyo sa Barangay Palaka, banwa sang Valladolid kun ngaa mas gamay ang food packs nga ila nabaton nagikan sa Department of Social Welfare and Development Region 6 kun ipaanggid sa iban nga mga barangay sa banwa nga nabahaan sang naglabay ang Bagyo Goring.
Sa interview sang Bombo Radyo kay Roy Tuale nga anay punong barangay man sang Palaka, ang ila nabaton ang ginalakipan sang bugas nga nabutang sa gamay nga plastic, duha ka sachet sang kape, isa ka sardinas kag isa ka corned beef.
Suno kay Tuale, ang mga pamilya sa iban nga barangay ang nakabaton sang isa ka karton nga food pack apang kagamay naman sang ila nga nabaton sa Palaka.
Ang Barangay Palaka ang may siyam ka purok apang ang labi nga apektado amo ang Purok I, II kag III.
Suno kay Tuale, nasulod sa karton ang goods nagikan sa DSWD apang taggamay lang ang ila nga nabaton.
Wala naman ini sang ideya kun ngaa mas gamay ang ila nabaton ukon kun ini ang ginbuhinan.
Suno naman kay Punong Barangay Ernesto Meridor, 250 ka food packs ang nakuha nila nagikan sa DSWD apang masobra 1,000 ang household sa Barangay Palaka.
Bangud sini, gin-istorya niya ang mga miyembro sang Barangay Council nga tulungaon nalang ang bugas kag canned goods agud nga matalalapod sa tanan bangud nagbakal man ang barangay sang dugang nga bugas agud nga makabaton ang kada isa.
Suno kay Meridor, ginhatagan ang tanan agud nga wala sang may magreklamo, apang sa karon, 600 households pa lang ang natagtagan.
Suno sa barangay official, wala sang lamud-pulitika sa tagtaganay sang food packs bangud halos tanan man nga balay sa barangay ang nasulod sang baha.
