Ginkalipay sang mga pumuluyo sa Barangay Bagtic, Silay City ang dessiyon nga indi na madayon ang Negros Occidental Bulk Water Supply Project nga magakuha kuntani sang tubig sa Hinalinan River/Imbang River sa Barangay Guimbala-on.
Madumduman nga ginbasura sang Sangguniang Panlungsod sang Silay City ang request nga resolution of no objection (RONO) para sa nasambit nga proyekto bangud ginapahayag nga indi makasarang ang kapasidad sang suba para sa malapad nga supply.
Sa interview sang Bombo Radyo kay Salvador Boy Elisan, Association President sa Sta Rita, dako ang iya pasalamat nga indi na madayon ang proyekto bangud madamo sang mga pumuluyo ang posible nga maapektuhan.
Pahayag sini nga ang programa sang ila gobyerno amo ang food security gani suno diri, paano nila ini mapadayon sang mga mangunguma kun sa ila tubig nga kunsumo ginakulang sila.
Ginklaro sini nga wala sila nagadinalok kun sa tubig man lang ang pagahisgutan apang suno diri bangud sa sitwasyon nila subong nga ginakulang sila sang tubig paano pa sila ayhan kapanghatag.
Nagapangabay man ini nga kuntani indi na i-quarry ang suba bangud sang nakaligad nga natabo nga nagtuga sang halit sa pila ka mga pumuluyo ilabi na sa mga estudyante nga nagapangsag-ob diri.
Paathag sini nga ila tinutuyo ang para sa kamaayuhan sang tanan kun sa diin sila ang nagatinguha nga makatanom agud makabulig sa mga pumuluyo.
Nagpasalamat man si Elisan kay Negros Occidental Governor Eugenio Jose “Bong Lacson sa pag-intindi kag pagrespeto sa desisyon sang ciudad sang Silay.
