Ginturn-over na kaina ang shelter starter kits sa 50 ka mga pamilya sa Barangay Gil Montilla, ciudad sang Sipalay nga nagub-an sang balay kadungan sang paglabay sang Typhoon Odette sang bulan sang Disyembre.
Kaina sang udto, mismo si Vice President Leni Robredo ang nagpanguna sa pagpanagtag sang shelter starter kits kun sa diin mabutang nalang sang dingding kag bubong ang mga residente.
Masobra isa na ka bulan ang nakaligad humalin sang naglabay ang bagyo apang wala gihapon nakabangon ang mga pumuluyo sa Barangay Gil Montilla kun sa diin ginatos pa sa mga ini ang wala nakapatindog liwat sang balay.
Suno kay Punong Barangay Gemma Trio sang Barangay Gil Montilla, 648 kabug-usan nga numero sang balay nga nawasak kadungan sang Typhoon Odette kag wala pa nakapatindog sang balay ang mga pamilya nga apektado.
Ang 50 ka benepisyaryo sa Gil Montilla ang ginalakipan sang 26 sa Purok Lubi, 13 sa Purok Kapayas kag 11 sa Purok Pinya.
Nangin emosyonal si Trio bangud naluoy ini sa mga kasimaryo nga wala pa nakapatindog sang balay kag nagapasilong lang sa tent kun mag-ulan.// Suno diri, mabudlay sa karon ang tubig kag pagkaon sa Gil Montilla.
Nagpasalamat man ini sa pribado nga mga donors nga nagahatag sang ayuda sa ila.
Suno kay Trio, ginalantaw nga isa pa ka tuig antes makabangon ang mga pumuluyo sa ila palangabuhian bangud napatay ang ila karbaw nga ginagamit sa talamnan kadungan sang pagbaha.
Ang Barangay Gil Montilla ang may kabug-usan nga 1, 975 total households, 648 ka balay ang totally-damaged kag ang nabilin ang partially-damaged.
