INDIA — Bangud sa konserbatibo nga kultura, tuman lamang ka diutay ang nagasaulog sang Valentine’s Day sa pungsod India.
Suno kay Bombo correspondent Marites Kalyanakumar nagikan sa Tamil Nadu, India, may influence na sang Western culture ang India apang wala ginasaulog sang kadam-an ang Valentine’s Day, magluwas lang sa pila ka bahin sang northern India.
Sa southern part sang India suno kay Kalyanakumar, mga married couples lamang ang nagasaulog sang Valentine’s Day apang diutay lamang katama bangud conservative ang ila culture.
Suno sa Pinay, may candlelit dinner sa restaurants kag may nagakadto man sa lugar nga manami ang klima apang wala sang mga pamatan-on kundi married couples lamang.
Ang mga single girls kag single boys naman ilabi na ang yara sa kolehiyo ang ginadumilian nga magpakita sang motibo sa ila naluyagan bangud nagasulod na diri ang arrangement sang pamilya gani ginatago nalang nila ang nabatyagan sa kaugalingon.
Suno kay Kalyanakumar, may mga bana man nga nagahatag sang bouquet of flowers sa ila misis nga Pinay apang diutay lang.
Sa pagkamatuod suno sa Pinay, wala man nagahatag sang bulak ang iya bana bisan nakahibalo ini nga kalipay ini sang mga Pilipina.
Suno sa Bombo correspondent, wala ginabaton sang mga Indians ang beliefs nga wala nagasanto sa tradisyon sang India gani wala sila nagasaulog sang Adlaw sang Paghigugma.
