Indi magselebrar sang paskwa ang mga pumuluyo sa Mozambique bangod sa nagakatabo sa karun nga kinagamo matapos ang eleksyon.
Sa interview sang Bombo Radyo Bacolod kay Honorary Consul of the Philippines in Maputo, Mozambique Don Tulcidas, sa normal nga kahigayunan, ang selebrasyon sang paskwa ang halos kaangay man sa Pilipinas bangod sila ang catholic country man.
Bisan ang pagkaon kag kustombre sa pagsaulog sang paskwa ang halos parehas bangod sila ang anay Portuguese-colony samtang ang Pilipinas ang sadto Spanish-colony.
Apang sa karun, nagdesisyon ang mga pumuluyo nga indi anay iselabrar ang paskwa tubtob wala pa matapos ang kinagamo.
Paathag sini nga humalin sang 1975, sang mahilway ang Mozambique sila ang ginpamunuan na sang ruling party nga Mozambique Liberation Front (Frelimo).
Sa masobra 50 ka tuig, wala pa makaagi nga napierde ang partido apisar sa pagpatigayon sang eleksyon kada 10 ka tuig kag duha ka termino.
Apang sa resulta sang eleksyon sang Oktubre 24, ang nagdaog amo si Venancio Mondlane, nga independent candidate.
Paathag ni Tulcidas nga nagpagwa sang madamo nga fake votes ang kampo ni Daniel Chapo sang ruling party apang ini ang napamatud-an man nga peke sang kampo ni Mondlane.
Bangod indi maghalin sa pwesto si Chapo, nagpanawagan na sang demonstrasyon si Mondlane nga nagresulta sang kinagamo.
Kun sa diin ginasakop sang mga pumuluyo ang main city, ginabalabagan ang mga salakyan kalakip na ang kapulisan, ginapangguba ang mga establishimento kalakip ang mga bangko, samtang nagaretaliate man ang otoridad nga nagresulta na sa pagkamatay sang halos 90 ka persona.
Ini ang may negatibo man nga epekto sa ekonomiya gani ang mga pumuluyo ang nagdesisyon nga solbaron anay ang problema kag sa masunod nga tuig na lamang iselebrar ang paskwa.
Si Mondlane ang ginpanugyanan man sang mga pumuluyo nga manago samtang wala pa nila mabawi ang kontrol sa gobyerno bangod ini ang makapila na nga ginpapatay.
Sa pihak sini aminado si Mondlane nga ang mga Pilipino ang mangita gid sang paagi nga maselebrar ang paskwa.
Gani panugyan na lamang sini nga likawan ang pag-upod sa mga protesta kag sa sulod sang balay na lamang magselebrar.
