Indi magnubo sa 76 ka pamilya kag 248 ka mga indibidwal ang nag-evacuate sa Sitio Tamburong, Barangay Caliling, banwa sang Cauayan kagab-i bangud sa Bagyo Betty.
Sa interview sang Bombo Radyo kay Punong Barangay Josel Popioco, sa ila partial report, 76 ka pamilya kag 248 ka mga indibidwal nagikan sa Sitio Tamburong ang nag-evacuate kagab-i kag nagtinir sa apat ka mga evacuation centers sang barangay.
Suno kay Popioco, kahapon, nagpatigayon sang Disaster Risk Reduction Management meeting ang barangay kag nagpatigayon sang rekoreda.
Pagkatapos sini, alerto man nga nagpadulong ang mga pumuluyo sa evacuation centers nga ginalakipan sang Barangay Hall, Caliling National High School, Daycare Center kag Elementary School sa barangay bangud nga flood prone area ang Sitio Tamburong.
Suno diri, positibo ang nangin response sang mga pumuluyo ilabi na sang mga senior citizens kag persons with disabilities (PWDs) nga una nga ginbalhin sa evacuation center samtang may mga lapsag man kag mga kabataan.
Magluwas sa kaugalingon nga banig kag comforter sang mga pumuluyo, may mga folding bed man nga gingamit ang mga ini nga amu man ang ginagamit kun magpatigayon sang blood letting.
Suno kay Popioco, kahapon nakahatag na ang barangay sang bugas kag delatas nga ginpanyapon kag ginpamahaw naman sang mga pumuluyo.
Nagbulig man ang local government unit sang Cauayan kag nagbisita man kaina sang aga ang Department of Social Welfare and Development.
Kaina, nag-abiso ang DSWD nga sarang na ang mga ini nga makapauli bangud wala man sang storm signal announcement kag nagabalik-balik lamang ang ulan apang ginbilin lamang sang mga ini ang ila mga gamit in kaso nga kinahanglan sang mga ini nga magbalik.
Nagpanugyan ini sa mga pumuluyo sang Sitio Tamburong nga mangin alerto kag magpadulong sa mga evacuation centers kun kinahanglanon.
