Ginpahayag sang gobernador sang Negros Occidental nga kuryente, tubig kag pagkaon ang kinahanglan sa karun sa sur nga bahin sang probinsya matapos ang iya pagpadulong sa Sipalay City sang Biyernes.
Suno kay Governor Eugenio Jose “Bong” Lacson, supply sa kuryente gid ang mayor nga problema sa Southern Negros bangud kapin 200 ka mga main post ang nagkalatumba bangud sa Typhoon Odette.
Suno kay Lacson, nakabaton na ini sang bulig nagikan sa mga electric cooperatives sa Iloilo kag nagpadala man sang manpower ang mga electric cooperatives sang probinsya agud makabulig sa pagpatindog sang nagkalatumba nga mga poste.
Suno diri, ginalauman nga magadangat pa sa isa ka bulan kag tunga ang hulaton sang mga pumuluyo sa Souther Negros antes makabalik ang kuryente.
Nagapadayon man ang mga pagbaton sang mga food packs kag tubig para sa mga evacuees.
Sa karun nagahulat ang gobernador sa National Housing Authority para sa ila financial assistance para sa mga partially damaged nga mga balay.
Suno sa iya, P5,000 ang igahatag sang NHA sa mga partially damaged nga puluy-an kag kun makaclaim na ang isa ka pamilya sang P5,000 nga ayuda para sa partially damaged houses, indi na sila maka-avail sang financial assistance para sa totally damaged nga balay sa masunod nga tuig.
