Nagdangat na sa masobra 50 mil ang nabakunahan sang COVID vaccine sa syudad sang Bacolod santo sa pinakaulihi nga data sang Biyernes bangud wala malakip sa datos ang nabakunahan sang Sabado.
Suno kay Bacolod City Mayor Evelio “Bing” Leonardia, 11,015 na ka mga Bacolodnon ang nakakompleto sang duha ka doses kag 47,334 ang nabakunahan sang first dose sang COVID vaccine, gamit ang AstraZeneca kag Sinovac vaccines.
Sang Sabado, ginbuksan man ang isa pa ka COVID vaccination center sa Robinson’s Place kag magadugang man sang lima ka barangay para sa vaccines inoculation.
Ginpahayag man ni Leonardia nga isa ang syudad sa mga nalakip na sa pagahatagan sang priyoridad sang COVID vaccines, upod ang NCR Plus Bubble.
Naghingyo man sa Bombo Radyo ang alkalde nga buligan ang syudad sang pagkampanya sa mga pumuluyo nga magpabakuna na batok sa COVID-19 agud madasig nga malab-ot ang herd immunity sa syudad.
Sa pihak nga bahin, pagasuguran naman ang vaccine inoculation sang Pfizer vaccine subong nga adlaw sa Negros Residences kag Teresita Lopez Jalandoni Provincial Hospital para sa probinsya sang Negros Occidental.
Ginalauman nga matigayon nga mabakunahan sang Pfizer vaccine ang kapin isa ka libo nga mga vaccinees kun sa diin nalista sang local government units (LGUs).
Nahibaluan nga may natalana ang probinsya nga 11,700 doses sang Pfizer vaccine para sa inoculation.
