Nagpahanumdom ang alkalde sang banwa sang La Castellana nga maghalong apisar nga nagkanay-kanay na ang aso nga nagagwa sa crater sang Mt. Kanlaon.
Sa interview sang Bombo Radyo kay mayor Rhumyla Nicor-Mangilimutan, kalmado na sa karun ang bulkan kag madutay na lamang ang nagalapta nga abo kag baho sang asupre.
Suno diri, yara sa gihapon sa evacuation center ang 940 ka mga indibidwal kun sa diin iban diri ang ginmasakit kag ginhapo.
Apang, preparado kag nakahanda ang mga food packs kag tubig.
Samtang, may yara sang wala nag-evacuate gikan sa ila nga balay nga ginapanugyanan nga maghalong bangod wala sang kasiguraduhan sa posible nga matabo.
Sa bahin naman sang banwa sang La Castellana, sa 13 ka mga barangay, anum tanan ang apektado kun sa diin nahalitan ang mga pananom nga mga pechay, kulitis, tangkong, talong kag iban pa, kag may yara man sang nagkalamatay nga mga isda.
Nagdeklarar naman sang state of calamity ang banwa agud maggamit ang calamity fund para ibulig sa mga affected families kag ma-utilize ang rescue teams.
