Liwat nga nagbalik sa evacuation center ang mga pumuluyo sang Barangay Quintin Remo, Moises Padilla kahapon matapos may nabaton nga report nga may isa na naman ka engkwentro apang ini ang false alarm lamang.
Sa interview sang Bombo Radyo kay Mayor Ella Yulo, sang Domingo, nakapauli na ang mga pumuluyo matapos nga naclear ang area apang kahapon, nakabaton ang mga ini sang report nga may engkwentro nanaman kag posible nga natrauma na ang mga pumuluyo gani sila ang nagbalik sa evacuation bitbit ang ila mga kasapatan.// Ginkumpirmar ni Yulo nga fake news ang report nga ila nabaton.
Suno diri, may mga pagkaon man nga ginprovide ang local government unit sa mga evacuees kag naghatag man ang Department of Social Welfare and Development (DSWD) Region 6 sang foodpacks kag hygiene kits.
Suno sa iya, nagapadayon ang kampanya sang barangay council sa pag-engganyo sa mga New People’s Army nga magbalik na sa sabak sang gobyerno.
Ginpakigbahin man sini nga ang bata sang isa sa mga napatay nga NPA ang nagalain ang buot sa iya amay bangud sila ang ginbayaan kag nag-upod sa hublag.
Suno sa alkalde, indi pa sini kuntani pagkuhaon ang bangkay sang iya amay apang siya ang ginkumbinse sang mga pumuluyo.
Ang LGU naman ang nagsabat sa pagpalubong sang mga rebelde nga residente sang banwa nga nadulaan sang kabuhi sa engkwentro.
Isa sa mga ginahingyo ni Yulo sa national government ang pagpasemento sang dalan agud mangin madasig para sa mga pumuluyo ang pagpabanwa kag pagdul-ong sang mga produkto nga makabulig sa ila palangabuhian.
Nagpanugyan man ini sa mga pumuluyo nga indi magkakulba, magpangamuyo kag indi magpati sa fake news kundi mamangkot gid sa barangay ukon militar.
