Gina-engganyo sang provincial health officer sang Negros Occidental ang mga pumuluyo nga magpabakuna sa tion nga mangin available na ang COVID vaccine bilang kabahin sang preventive measure batok sa virus.
Sa interview sang Bombo Radyo kay Dr. Ernell Tumimbang, ginpahayag sini nga magapadayon sa pagpatuman sang health protocols ang probinsya ilabi na nga nareport na sang Miyerkules ang labing una nga kaso sang bag-o nga variant sang COVID-19 nga nadetect sa United Kingdom.
Suno kay Tumimbang, mas madasig ang transmission sang ini nag variant kun ikumparar sa orihinal nga coronavirus.
Apisar sini, nagpasalig ang provincial health office nga nagapadayon ang probinsya sa paghimo sang mga tikang agud maprotektahan ang mga pumuluyo.
Suno diri, ginaubra sang provincial government kag sa mga local government units ang ila masarangan agud ma-address ang transmission kag mabantayan ang borders.
Isa man ka tikang suno kay Tumimbang amu ang pagsuporta sang gobyerno sa vaccination gani iya gina-engganyo ang mga pumuluyo nga makigbahin sa pagpabakuna para sa dugang nga proteksyon.
