TEXAS—Nagapangatubang karon sang water shortage ang mga pumuluyo sa Texas, USA bangud sa makamamatay nga winter storm nga nagresulta sang pagrulupok sang mga pipe.
Sa interview sang Bombo Radyo Bacolod kay Bombo International Correspondent Pinoy Gonzales direkta sa Texas, USA, ginpahayag sini nga apisar nagbalik na ang ila nga kuryente, madamo sa gihapon sang lugar sa ila estado ang wala pa sang tubig kag suplay sang kuryente bangud kalabanan sa mga linya ang nagkalaguba.
Kalabanan sa mga pumuluyo sa Texas suno kay Gonzales ang nagainit anay sang tubig antes imnon kasunod sang pila ka adlaw nga nakarekord sila sang manubo nga temperatura nga nagguba sang mga imprastraktura kag nag-froze sang mga pipes.
Sa karon suno kay Pinoy, nagapanghanda sila kag nagapainit gid sang ila nga balay bangud indi mapaktan ang brownout. Ginalantaw naman sini nga sa bulan pa sang Abril matunaw ang ice storm sa ila lugar.
