Kasunod sang pahayag ni Presidente Rodrigo Duterte nga pagadakpon ang mga Punong Barangay sa tion nga makadakop ang mga kapulisan sang nagapatigayon sang mass gatherings sa ila mga nasakupan, nagpatawag man sang meeting si Bacolod City Mayor Evelio “Bing” Leonardia sa mga Punong Barangay sa ciudad kahapon.
Suno kay Bacolod City Administrator Em Ang, ginpalab-ot sini sa tanan nga mga kapitan ang mensahe sang presidente.
Ginpaathag man sini ang importansya sang koordinasyon sa tagsa ka mga barangay ilabi na sa pagsunod kag pagpatuman.
Dugang pa ni nga mas hugot na ang pagpatuman sa ciudad may kaangtanan sa pagtililipon, kun sa diin ang anay 50% nga capacity santo sa quarantine status nga Modified General Community Quarantine (MGCQ), ginpanubo ini sang alkalde sa 30%.
Ginpakigbahin man ni Ang nga ginmando ni Leonardia ang hugot nga pagmonitor sa mga ginpang seal-off nga mga puluy-an sang mga nagpositibo nga indibidwal.
Suno sa City Administrator, nga nakaquarantine sa mga nakaseal-off nga balay ang mga close contacts sang mga nagpositibo.
Apang suno diri, masami nga nagagwa gihapon ang mga indibidwal nga nalakip sa nakaquarantine.
Aminado si Ang nga iban sa mga lokal nga opisyales, Barangay Health Emerency Response Teams (BHERTs) kag mga tanod ang nakapoy na man bangod sa masobra na isa ka tuig nga pagpangatubang sang pandemic gani wala na sang mga ini nagakatutokan ang estrikto nga pagbantay sa mga nakaquarantine nga pumuluyo.
