Ginpanindugan sang chairman sang inter-agency task force against coronavirus sa ciudad sang Bacolod nga magasunod gid si Mayor Evelio “Bing” Leonardia sa ipatuman nga direktiba ni Presidente Rodrigo Duterte angot sa mangin quarantine status sang ciudad.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga pagasundon gid sang alkalde ang ano man nga desisyon sang national government.
Suno pa diri, ginsapol kahapon ni Leonardia ang mga Punong Barangay sa ciudad agud handaan ang pagpauli sang mga locally stranded individuals kag mga returning overseas Filipino workers.
Isa sa ginhatagan pagtamod sang alkalde amo ang pagpabaskog sa Barangay Health Emergency Response Team (BHERTs).
Ginkumpirmar man ni Familiaran nga ang magaabot nga mga LSIs kag mga repatriated OFWs ang dal-on sa gihapon sa mga quarantine facilities kag ipaidalom sa swab test.
Kun negatibo ang RT-PCR test result sini, pwede na papulion ang mga ini agud magpadayon nalang sang home quarantine kag imonitor sang BHERTS.
Apang, kun magpositibo naman, kinahanglan sini nga magpabilin sa quarantine facility tubtob nga mag-ayo.
Samtang, kun pahanugutan, luyag kuntani sa gihapon ni Familiaran nga ipadayon ang travel authority agud masiguro nga hilway sa sintomas sang COVID-19 ang amo nga persona.
Dugang pa sini, luyag niya man nga ipaidalom sa regular nga rapid testing kada tatlo ka bulan ang mga authorized person outside residence (APOR) nga masami nagabalik-balik sa Iloilo-Bacolod vice versa.
