Naghingyo ang presidente sang Liga ng mga Barangay sa ciudad sang Bacolod sang kooperasyon sang mga pumuluyo kasunod sang mandu ni Presidente Rodrigo Duterte nga arestuhon ang mga punong barangay nga nagapahanugot sang mass gathering nga ginakabig bilang superspreader sang coronavirus.
Sang Miyerkules sang gab-i, ginpahayag ni Duterte nga ang barangay chairman ang manabat sa krimen nga dereliction of duty sa idalum sang Revised Penal Code kun indi sang mga ini mapunggan ang pagtililipon sa ila jurisdictions.
Ang ini nga mando ang ginhatag ni Duterte sa Philippine National Police kag tanan nga law enforcement agencies matapos ginreport ni Interior Secretary Eduardo Año ang mga insidente sang mass gatherings lakip na ang mga picnics kag parties.
Sa interview sang Bombo Radyo kay City Councilor Lady Glez Gonzales, tayuyon ang pagpatuman sang mga barangay officials sang pagsulundan nga nagadumili sa mass gathering apang indi man mabantayan ang bilog nga barangay sa sulod sang 24 oras bangud sa kalaparon sini.
Bangud sini, nagahingyo si Gonzales sang kooperasyon sang tanan kag ipaiway ang pagtililipon.
Nag-apela ini nga ireport sa barangay officials kun may tupad-balay nga nagatililipon bangud may mga residente nga ila lang ginapalumbos ang barangay tanod kag Task Force Disiplina.
Sa pagsinapol kahapon kaupod ang mga city officials kag Bacolod City Police Office, gin-istoryahan kun paano mapabakod ang enforcement sang health protocols.
Suno kay Gonzales, kinahanglan gid ang kooperasyon bangud bisan nagsugod na ang vaccination, diutay pa lang ang nabakunahan.
Suno kay Bacolod City Police Office director Police Col. Manuel Placido, nagapati ini nga cooperative man ang mga barangay officials sa ciudad kag indi magdangat sa punto nga magdinakpanay.
Suno kay Placido, igaremind nila ang mga barangay officials angot sa health protocols kag kun magsulit-sulit, ila na nga ipatuman ang mandu sang presidente.
