Plantsado na ang precautionary measures nga ipatuman sang Barangay Estefania, siyudad sang Bacolod sa tion nga ipanagtag na ang 2nd tranche sang social amelioration program (SAP) cash grant.
Nahibaluan nga gikan sa virtual conference nga ginpatigayon sang mga opisyales sa Western Visayas, kumpirmado na nga nalakip ang Bacolod City sa mga mahatagan sang 2nd tranche apang wala pa sang napagwa nga guidelines tuhoy diri.
Sa interview sang Bombo Radyo Bacolod kay Punong Barangay Jerry Tingson, ginpahayag sini nga maga-assist ini sa pagpatuman sang pagpanagtag sa bulig pinansyal.
Suno diri, magabulig ang mga ini sa pag-implementar sang social distancing kag pagpatuman sang pagsuksok sang face mask.
Suno diri, una sa gihapon nga prayoridad ang ikaayong lawas sang mga pumuluyo.
Ginklaro naman sini nga plastado na ang systema sang barangay natuhoy sa pagpatigayon sang distribusyon, kag siguruhon sang mga ini nga matawhay kag madasig ang pagbaton sang mga pumuluyo sa benepisyo.
Nakatalana naman nga lain ang managtag sang bulig pinansyal sa pagpanguna sang kapulisan, gani magabulig nalang sa implementasyon ang barangay.
Nahibaluan nga yara sa 7,056 ang nakabatun sang P6, 000 sa 1st tranche sa nasambit nga barangay.
Suno kay Tingson, pagadugangan pa ang pagahatagan apang wala pa ini makahibalo kun pila ang igadugang diri suno sa ibalwasyon sang DSWD.
Nagpalab-ot man ini sang mensahe sa mga pumuluyo sa Brgy. Estefania nga sundon ang mga pagsulundan sang gobyerno bangod para man ini sa kaayuhan sang tanan.
Ginapasalamatan man sini ang kooperasyon sang mga pumuluyo sa pagmintinar nga COVID-Free ang barangay.
Samtang nagalaom si Punong Barangay Ricky Mijares sang Barangay Banago, Bacolod City nga mahatagan prayoridad ang mga kwalipikado apang wala nakabaton sang bulig pinansyal sa 1st tranche para sa pagpanagtag sang 2nd tranche sang social amelioration program (SAP) cash assistance.
Suno kay Mijares, magahingyo ini nga mahatagan naman sa masunod nga tranche ang mga pumuluyo nga kwalipikado apang wla madala sa una nga pagpanagtag bangod sa may qouta lang nga ginahatag sa tagsa ka barangay.
Suno pa diri, madamo sa mga residente ang nakafill-out sang form kag kwalipikado man ang wala mahatagan kag nagabalik-balik sa barangay.
Nagapamangkot ang mga ini kun ngaa wlaa sila mahatagan apisar nga kwalipikado man santo sa direktiba sang DSWD.
Samtang wal naman ini makahibalo kun pila ang qouta nga igahatag sang DSWD sa barangay para sa mahatagan sang 2nd tranche.
Ginpaathag man sini nga indi na ang barangay ang managtag sang bulig pinansyal kundi ang mga katapo sang PNP kag AFP.
Nahibaluan nga 15,000 ang dapat nga benepisyaryo sang barangay apang 4, 711 lang ang quota nga ginhatag sang DSWD sa 1st tranche.
Mensahe naman sini sa mga pumuluyo sang barangay nga tinguahaan sini nga mapalab-ot ang hingyo sa DSWD para mapahibalo nga madamo pa ang mga nagakinahanglan nga dapat maprayoridad naman sa amo nga programa.
