Ginkumpirmar sang spokesperson ni Bacolod City Mayor Alfredo “Albee” Benitez nga nagpadulong sa Hong Kong kag Macau ang mga punong barangay sa ciudad sang Bacolod kaupod ang alkalde para sa benchmarking activities kaupod ang alkalde.
Sa interview sang Bombo Radyo Bacolod kay Barangay Sincang-Airport Punong Barangay Atty. Caesar Distrito, nagpadulong sa nasambit nga pungsod ang mga punong barangay sang ciudad humalin kahapon, Abril 11 tubtob Abril 14, 2024.
Gin-athag man ni Distrito nga personal nga kwarta sang alkalde ang gingasto sa pagpadulong sang mga punong barangay sa Hong Kong kag Macau gani wala sang gasto ang ciudad diri.
Suno diri, magapatigayon ang mga punong barangay sang seminars kag paghinun-anon agud nga mapasanyog pa dugang ang mga kabarangayan sa ciudad.
Samtang ang mga Barangay Kagawad naman ang may yara sang aktibidad nga patigayunon sa ciudad sang Sipalay, Negros Occidental sa katapusan sang Abril.
Sa karun ang acting city mayor sa ciudad sang Bacolod amo si Councilor Israel “Ising” Salanga.
Apang suno kay Distrito may yara man sang punong barangay nga nagpabilin kaangay kay Barangay Alijis Punong Barangay Donnie Dela Vega bangud sa health issue.
