Plano sang chairman sang Committee on Urban Poor, Housing, and Resettlement sa Sangguniang Panlungsod sang Bacolod nga magdihon sang ordinansa nga butangan sang fire extinguishers ang 195 ka mga purok nga gindeklarar nga red zone ukon fire zone sang Bureau of Fire Protection (BFP) – Bacolod.
Suno kay Councilor Vladimir Gonzalez, bangod sa asod- asod nga sunog nga nagluntad sa ciudad, luyag sini nga magdihon sang ordinansa kun sa diin may kapin sa tatlo ka fire extinguisher ang ibutang sa kada pruok nga gindeklarar nga red zone.
Dugang pa sini, dapat nga may drainage system ang kada purok kag naplastar sang insakto ang linya sang kuryente ilabi na nga kalabanan nga electrical in nature ang rason sang mga sunog nga nagluntad.
Luyag man sini nga mahatagan sang ligwa ang dalan sang mga purok para nga mahapos ang road access inkaso nga may emerhensya.
Sa mahibaluan, ang 195 ka mga Purok nga gindeklarar nga red zone ang ginalakipan sang 48,467 ka mga balay, 57,798 ka mga pamilya ukon 170,143 ka mga indibidwal.
