Madamo ang nakalinya nga mga aktibidad para sa selebrasyon sang Masskara Festival 2025 halin Oktubre 1 tubtob Oktubre 19.
May yara sang mga patigayunon nga sectoral events magluwas sa cultural events.
Ini ang tion agud nga ipakita sang mga pumuluyo gikan sa nagkalain-lain nga sector sang sosyodad ang ila nga mga abilidad.
Isa sa event nga patigayunon ang PWD G: Masskara PWD Got Talent nga pasakupan sang mga Person With Disabilities.
Sa nasambit nga event ipakita sang mga PWDs ang ila mga talento kag abilidad, nga patigayunon sa isa ka mall katupad sang Provincial Capitol.
Indi lang pagpaindis-indis sang talento ang natalana para sa mga PWDs, bangod hatagan man ang mga ini sang platform nga makabaligya sa PWD products fair.
Samtang may yara man sang magic show para sa mga bata nga may autism spectrum nga tambungan sang Special Education students, kag may yara man sang professional talks kasubong man sang gift giving sa mga kabataan kag ginikanan nga may special needs.
Sa pahayag ni Mimai Arban, organiser sang PWD G: Masskara PWD Got Talents, indi lang ini competition kundi pagpakita man sang inclusivity, kun sa diin tanan ang sarang makigbahin sa kapiyestahan.
Suno diri ang PWD G, ang nagakahulugan nga pwede gid ang tanan.
Ginpasalamatan man sini si Bacolod City Mayor Greg Gasataya kag ang Bacolod Gugma Foundation sa suporta nga ginhatag sa pag-organisar sang event.
