Natumod na ni Bacolod City Mayor-elect Greg Gasataya ang mga rasun sa nagaluntad nga pagbaha sa pila ka bahin sang ciudad sang Bacolod kag ini ang may mga natalana naman nga solusyon.
Sa interview sang Bombo Radyo Bacolod, naghagan-hagan na sadto sang ginbutangan floodwall ang sapa sa Purok Carvic sa Brgy Mandalagan kag nabutangan sang drainage.
Sa ila pag-inspect, nakita nila nga liwat na nga nagkipot ang sapa kag madamo na sang mga nagtambak nga basura nga nagtura sang nakaligad nga pagbaha.
Suno diri, ini ang magakinahanglan gid sang dregding bangod indi ini masarangan sang mano-mano nga tikang ukon paggamit lamang sang pala.
Interview with Bacolod City Mayor-elect Greg Gasataya
Samtang natumod man nila ang rasun sa pagbaha sa Lopues Mandalagan kun sa diin may tion nga hinali na lamang nagabusawak ang tubig gikan sa manhole.
Paathag ni Gasataya nga sadto may creek sa area, apang bangod sa developments nga indi man mapunggan, ang anay creek ang nadula na ukon yara na sa idalom sang mga establishimento.
Gani ang tikang na gid lamang nga mahimo amo ang pagpatigayon sang declogging, magluwas lamang kun may makita nga iban nga palaagyan sang tubig.
Kalakip sa ila short term solution ang declogging, dredging naman para sa medium term kag paghimo sang iban nga malutsan sang tubig sa bulig sang Department of Public Works and Highways kag National Government para sa long term solution.
Samtang ang pagbaha naman sa bahin sang SM City Bacolod ang bangod wala pa naga-operate ang Reclamation Channel.
Paathag ni Gasataya nga apisar nga na-obra na ang channel, ini ang indi pa mabuksan bangod wala pa sang flood gate.
Ang flood gate ang magasarado inkaso magsaka ang tubig gikan sa dagat agud indi magsulod sa ciudad.
Suno kay Gasataya, mas dako nga problema kun buksan na nga wala sang flood gate ang Reclamation Channel bangod kun magsaka ang tubig sa baybayon, ini ang mahimo makatuga sang mas malala nga pagbaha sa ciudad.
Nagalaom ini nga sa Setyembre ukon Oktobre, matakdan na sang flood gate ang Reclamation Channel agud ini ang mabuksan na kag makasolbar sang problema sa pagbaha.
