BACOLOD CITY-Gin-aprubahan ni Bacolod City Mayor Evelio “Bing” Leonardia ang mga rekomendasyon nga ginpasa sang Inter-agency task force againts coronavirus nahanungod sa dugang nga mga preemptive measures nga ginpatuman sang city government.
Suno kay Vice Mayor El Cid Familiaran nga chairman sang nasambit nga task force, ila anay ireschedule ang pag-abot sang 87 ka mga Japanese recruiters sa probinsiya sa masunod nga semana.
Nahibaluan ang Japanese recruiters ang magapadulong sa Murcia sa masunod nga semana kag magapang-recruit sang kapin 500 ka mga skilled workers.
Magluwas diri, temporaryo man nga ikanselar ang mga barangay fiesta kag charter day.
Posible suspendiron na man lang ang mga moving up kag graduation ceremonies sini nga pagtapos sang school year.
Apang suno kay Familiaran, yara naman sa gihapon sa Department of Education (Dep-Ed) ang desisyon tuhoy diri.
Ginhatagan-pagtamod man sang task force ang istrikto nga pagpasa sang health declaration card sa mga pantalan kag airport.
Nahibaluan nga nagadangat na sa 24 ang kumpirmado nga kaso sang COVID-19 sa pungsod.
