Nagapanawagan sang bulig ang mga biktima sa sunog sa Purok Paghidaet, Barangay 29, Bacolod City kahapon pasado alas-5:00 sang hapon.
Ang mga apektado nga pumuluyo ang ginsaylo sa Apolinario Mabini Elementary School sa Barangay 28, bangod wala sang kuryente ang Barangay Hall sang Barangay 29 kun sa diin sila una nga ginhamtang.
Sa interview sang Bombo Radyo Bacolod kay Donnamae Diopeta, single parent, ginhulat lamang nila nga magdangat sa pito ka kilo ang iya isa ka tuig nga bata nga babayi agud nga ini ang mapa-operahan bangod sa Congenital Heart Disease.
Suno sa iya, nagatipon na lamang sila sang kwarta kag nakumpleto na ang tanan nga papelis nga kinahanglan, apang tanan nga mga papelis ang na-upos sa nagluntad nga sunog.
Pahayag ni Diopeta nga siya ang nagabaligya sa downtown sang nagluntad ang sunog kag ginbilin lamang sini ang iya nga bata sa iya bayaw.
Ginapasalamat na lamang sini nga nasalbar sang iya magulang ang bata, bangod ang iya bayaw ang nagsalbar man sa kaugalingon sini nga mga kabataan.
Nagapanawagan si Diopeta sang makabulig sa iya para sa operasyon sang iya nga bata, bangod nakalab-ot na ini kuntani sa required nga bug-at.
Dugang pa sini nga kaupod man sa nasunog ang mga bulong sini nga ginbakal, kag indi pa ini makabakal sa karun bangod nasunog man ang mga resita.
Nagpanawagan naman sang bulig in-cash ukon in-kind ang isa pa ka nasunugan para sa ila magamit ilabi na nga sila ang wala ang nasalbar sa nagluntad nga sunog.
Sa interview sang Bombo Radyo Bacolod kay Hera Garcia, balik gid sila sa umpisa bangod na-upos ang ila mga pagkabutang matapos masunog ang balay sang iya tiyo, nga gina-estaran sang lima ka pamilya.
Suno diri, nagahimos na ini kuntani agud magtambong sa fiesta sa ila Barangay sang natabo ang sunog.
Masakit para sa mga ini ang natabo bangod sa pagtakop sang tuig sila ang wala naman sang puluy-an.
Kaina sang kaagahon, sila ang gin-estorya naman sang mga personnel sang Department of Social Services and Development (DSSD) para sa assessment sang kadakuon sang kahalitan sang ila puluy-an.
Kapin 30 naman ka mga folding beds ang ginpadala sang Bacolod City Disaster Risk and Reduction Management Council (CDRRMO) kag sila ang nakabatun naman sang mga blankets kag hygiene kits.
Panawagan ni Garcia ang bulig para sa ila mga panginahanglanon kalakip na sa makaon, mainum kag mga panapton.
