Tubtub kaina ang pagtinir sang mga pumuluyo sang Barangay Quintin Remo, Moises Padilla sa evacuation center matapos nga nagbalik sila diri kahapon matapos may nabaton nga report nga may isa na naman ka engkwentro apang ini ang false alarm lamang.
Sa interview sang Bombo Radyo kay Punong Barangay Felisa Villaflor, ang mga evacuees ang nagikan sa Sitio Napiluan sang Barangay Quintin Remo kag Sitio Kuyawyaw sang Barangay Inolingan.
Nagdangat sa kapin 18 ka mga pamilya ukon 50 ka mga indibidwal ang yara sa evacuation center.
Suno kay Villaflor, nakibot ini kahapon sang nagpadulong ang mga pumuluyo sa evacuation center bitbit ang ila mga bag kag pamilya alas-5:00 sang hapon.
Wala man sang ideya ang 62nd Infantry Battalion kun ano ang rason sang gulpihanay nga pag-evacuate sang mga pumuluyo.
Dugang pa ni Villaflor, naglapta ang impormasyon nga may yara sang nagpapanaog sa mga residente para mag-evacuate.
Wala naman sang problema bangod nga preparado man ang local government unit kag yara man ang barangay sa pag-assist sa mga evacuees.
