Ginkumpirmar sang pinuno sang inter-agency task force against coronavirus sa ciudad sang Bacolod nga indi na pag-iquarantine ang mga magapadulong sa ciudad kun magbalik na ang operasyon sang seaports kag airport sa Hunyo 1 basta nagikan ang mga ini sa mga lugar nga makabig low-risk areas.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga wala sang quarantine areas nga butangan sang mga ini.
Suno kay Familiaran, sa isa ka adlaw nagadangat sa 3 mil ang mga pasahero nga naga-abot sa Bredco port sang normal pa ang operasyon sini.
Kun magbalik na ang mga biyahe sang mga fastcraft kag roro vessels, ginalauman sini nga magadangat sa isa ka libo ka mga pasahero ang magapadulong sa Bacolod kada adlaw kun 50 porsyento lamang sang capacity ang mahimo makasakay.
Gin-athag man sini nga ipatuman man sang mga barko ang health protocols para sa mga pasahero agud malikawan ang virus.
Samtang, ginpahayag naman ni Negros Occidental Vice Governor Jeffrey Ferrer nga gina-istoryahan pa nila ni Governor Eugenio Jose “Bong” Lacson kun ano ang plano nga pagahimuon sa pagbukas sang mga seaports kag airport.
Suno diri, dugang nga problema para sa mga nagasulod sa Negros Occidental kun mapaidalom sila sa COVID-19 testing bangud kinahanglan nila nga magbayad sang P1,200 tubtob P1,300.
Dugang pa sini, kinahanglan pa mangita sang holding area para sa mga maabot nga pasahero.
Sa karon, indi pa ini makahatag sang desisyon bangud suno kay Ferrer talakayon pa nila ini.
