Nakapauli na ang mga residente nga nag-evacuate kasunod sang nagluntad nga engkwentro sa Sitio Atoy-atoy, Barangay Gil Montilla, Sipalay City sang Sabado sang hapon.
Nasugata sang 15th Infantry Battalion sang Philippine Army ang ginabanta 15 ka mga katapo sang Southwest Front Komiteng Rehiyon-Negros, Cebu, Bohol, Siquijor nga grupo sang New People’s Army.
Sa interview sang Bombo Radyo kay Dionilo Bogtae, executive assistant for operations sang Sipalay City, 47 ka mga pamilaya ukon 186 ka mga indibidwal ang nag-evacuate sa isa ka simbahan kag covered court sang barangay.
Apektado ang duha ka barangay sang ciudad kun sa diin una nga nagluntad ang engkwentro sa Barangay San Jose kag naulamid ang Barangay Gil Montilla.
Matapos nga gindeklarar nga clear na ang area, gindul-ong sang local overnment ang mga residente sa ila nga mga lugar.
Sila man ang ginhatagan sang food packs, bugas, noodles kag canned goods nga ila dal-on sa pagpauli.
Wala naman sang nasamaran sa bahin sang militar sa nasambit nga engkwentro samtang wala matumod kun may nasamaran ukon casualties sa mga rebelde.
Mensahe ni Bogtae sa mga pumuluyo sang Sipalay nga importante ang ila nga safety ilabi na sa mga kabataan kag katigulangan gani mag ulo-aligmat sa tanan nga tion.
