Apisar nga wala sang storm signal warning ang Negros Occidental, ginpaidalum ini sa gihapon sa Red Alert Status bangud sa kahangawa sang pagbaha nga madulot ni Bagyo Auring.
Sa interview sang Bombo Radyo Bacolod kay Dr. Zeaphard Gerhart Caelian, Provincial Disaster Management Program Division head, ginpahayag sini nga bangud may yara sang storm signal warning ang Negros Oriental, apektado sini gihapon ang Negros Occidental.
Suno kay Caelian, delikado sa pagbaha ang Ilog, Hinobaan, Kabankalan kag Sipalay bangud ang head waters sang mga suba sa amo nga mga area ang nahamtang sa Negros Oriental.
Dugang pa sini nga apisar wala sang storm signal warning sa probinsya, indi gid dapat magpakampante bangud nga delikado man sa gihapon ang light to moderate at times to heavy rain.
Paathag sini, kun magdangat sa anom ka oras ang pag-ulan-ulan kag dunganan sang taob, sigurado gid nga magabaha ilabi na sa mga low-lying areas.
Liwat man ini nga nag-abiso sa mga mangingisda nga indi nalang anay maglayag bangud sa gale warning.
Samtang, ginkumpirmar naman sini nga ang mga locally stranded individuals nga maga-abot sa probinsya subong nga Sabado kag sa Domingo ang magatinir anay sa Silay Quarantine Facility agud nga maka-concentrate ang mga DRRMO responders sa preparasyon kay Bagyo Auring.
