Sa masunod nga semana, magabiya na sa pangpang sang Mambulok Creek ang mga residente nga ginrelocate sang Bacolod City government sa Abada Escay sa Barangay Vista Alegre.
Suno kay Luz Jawod, nagpahibalo ang ila punong barangay nga ihatag na sa Lunes ukon Martes ang ila financial assistance nga P10,000.
Suno kay Jawod, mahimo nga magasaylo na sila sa relocation site sa Biyernes.
Sanday Jawod ang iga-relocate sa Abada Escay, upod ang 32 ka iban pa nga pamilya.
Nagpasugot naman ang mga kasilingan niya nga sila ang iga-relocate, basta may mabaton nga financial assistance nagikan sa city government.
Sanday Jawod ang gin-awardan sang ciudad sang duta sa Abada Escay kag sila na ang magapatindog sang balay.
Naamat-amatan naman sang iya kabataan ang pagpatindog sang balay sa lugar agud nga may maistaran sila kun magsaylo didto sa masunod nga semana.
Si Jawod ang may apat ka kabataan kag duha ka apo gani pito sila tanan nga magasaylo sa Abada Escay.
Ang iya mga kabataan ang nagaubra sa construction site gani wala sang problema kun sila ang magasaylo sa relocation site.
Suno naman kay Owen Adiong, magaarkila sila sang balay samtang nagapahimo sang balay sa Abada Escay.
Suno sa iya, kinahanglan nga mahuman ang ila balay antes magsaylo sa Abada Escay bangud dalaga na ang duha niya ka kabataan.
Si Adiong ang nagapangisda agud nga maka-income samtang ang iya misis ang nagalibod man sang isda.
Ang duta nga patindugan nanday Adiong ang gin-award sa ila tatlo ka semana na ang nakaligad.
Sanday Adiong ang ginhatagan sang tubtub Hulyo 17 agud nga makabiya sa pangpang sang Mambulok Creek
