Mga residente nga nagapuyo sa sulod sang 4km permanent danger zone, plano nga irelocate malayo sa bulkan

Pagadiskusyonan bwas nga adlaw sang mga alkalde sang banwa sang La Castellana kag ciudad sang La Carlota kag Bago kaupod ang gobernador sang Negros Occidental ang plano nga dapat may permanente nga saylohan ang mga pumuluyo nga apektado sa paglupok sang bulkan Kanlaon ilabi na ang nagapuyo sa sulod sang 4km permanent danger zone.

Suno kay Negros Occidental Provincial Administrator Atty Rayfrando Diaz, magasapol bwas ang mga akalde kaupod si Governor Eugenio Jose ‘Bong’ Lacson agud mahibaluan kun may yara sang duta ukon propedad ang Local Government Unit nga mahimo saylohan sang mga residente.

Suno diri, ang lugar ang dapat malayo agud bisan pa maglupok ang bulkan indi na sila mahalitan kag mapahagan-hagan ang sitwasyon.