Nagpatigayon sang clearing operation sa Sitio Tamburong, Brgy Biak na Bato, banwa sang La Castellana matapos nga nag-awas sa taytay ang lahar naggikan sa Bulkan Kanlaon.
Sa interview sang Bombo Radyo kay Gavino Nacion, residente sa nasambit nga barangay, alas- 2:00 sang hapon sang nag-awas sa taytay ang lahar.
Suno diri, nag-ulan sa ibabaw sa bulkan kag amo nga nag-ilig ang tubig nga may dala nga abo, bato kag mga kahoy.
May yara sang dalagko nga kahoy nga nagbalabag sa idalum sang taytay rason nga nag-awas ang lahar sa dalan nga naglab-ot pa ini tubtob sa tuhod.
Gilayon naman nga naghalin sa area ang mga residente kun sa diin may yara pa sang isa ka motorsiklo nga natumba nga ginhingagaw nga buligan samtang may mga kasapatan naman nga wala na naluwas pa kaangay sang kanding kag manok nga nadala sa lahar flow.
Bangod sa lahar, nastranded ang iban nga mga manugbyahe matapos nga indi na malabyan ang taytay.
Gilayon naman nga gin-clear ang dalan sa bulig sang Department of Public Works and Highways.
Suno kay Engr. Andres Yanguas, Area Engineer sang DPWH 2nd Highway Engineering District Binalbagan, gingamit ang mga dump truck, grader, kag heavy equipment loader sa paghawan sang dalan.
Nagdangat sa kapin sa 26 ka truck load ang nahakot nga lutak.
