Ginakulang sa mainom nga tubig ang mga residente sang Sitio Tamburong, Barangay Bi-ak na Bato sa banwa sang La Castellana.
Ini kasunod sang ginpatigayon nga evacuation efforts bangod sa natabo nga lahar flow kung sa diin nag-awas sa sapa ang tubig ulan nga may kaupod nga abo kag asupre kasubong man ang dalagkuan nga mga bato kag mga nautod nga puno sang kahoy.
Ini ang natabo pila lamang ka adlaw kasunod sang paglupok sang Bulkan Kanlaon.
Sa interview sang Bombo Radyo Bacolod kay Punong Barangay Joselito Martinez sang Barangay Bi-ak na Bato, masobra 400 sa ila nga mga residente ang nagpadulong sa mga eskwelahan nga nagserbe nga evacuation site.
Samtang masobra 100 naman ang nagtinir sa covered court sang Barangay Bi-ak na Bato.
Suno kay Martinez, pila sa mga amay ang ginpahanugutan sini nga makapauli kaina sang aga bangod wala sang maga-asikaso sa nabilin nga mga kasapatan.
Pasalig naman ni Martinez nga sila ang nagadispatch sang Barangay Tanod agud magtsekyar sa mga puluy-an nga wala sang nagabantay.
Ginaseguro man sini nga mahandaan sang pagkaon ang mga evacuees apang sila ang ginakulang sang mainom nga tubig.
Kaina sang aga, may nag-abot nga donasyon sang tubig gikan sa isa ka pribado nga negosyante, apang ini ang ginkulang kun sa diin may nagpangayo nga wala na nila mahatagan.
Nagapasalamat man ini sa tanan nga nagpalab-ot sang bulig kaangay sang foodpacks kag tubig; samtang panawagan man nila sa mga luyag pa magbulig nga kun mahimo sila ang padal-an sang dugang nga mainom nga tubig.
