SA BALITA INTERNATIONAL… SA JAPAN – Gin-abisuhan ang mga residente sa Okinawa, Japan nga maghalong sa makusog nga hangin kag ginalauman matag-as nga mga balod kadungan sang paglabay sang Typhoon Hinnamnor ukon Bagyo Henry nga nagikan sa Pilipinas.
Sa report ni Bombo correspondent Josel Palma nagikan sa Yokohama, Japan, ginalauman nga magabalik sa southern prefecture sang Okinawa bwas, Domingo apang nagaguom na lakip na sa Yokohama subong nga adlaw.
Suno sa Japan Meteorological Agency, ang Typhoon Hinnamnor ang pinakamabaskog nga hurricane subong nga tuig 2022.
Kaina sang aga, yara ini sa south sang Okinawa Island, dala ang kabaskugon sang hangin nga nagadangat sa 241 kilometers per hour kag ika-onse nga tropical storm nga nagdevelop bilang typhoon subong nga tuig.
Ini ang ginalauman nga magapabilin sa south sang Okinawa tubtub karon sa gab-i antes maggwa pakadto sa north.
Ini ang ginaforecast nga magadala sang makusog nga hangin nga mahimo magguba sa mga pamalay sa isla gani gin-abisuhan ang mga pumuluyo nga maghalong sa bayolente nga hangin kag matag-as nga balod.
Ini ang magapadayon sa paghulag sa ibabaw sang East China Sea kag magasulod sa Kyushu Region kag iban nga bahin sang western Japan sa masunod nga semana.
Ini ang ginhatagan sang highest classification nga bayolente nga sahi sang bagyo.
Ang Okinawa Region nga iguon sang bagyo ang may 1.4 million nga populasyon kag nagahost sang kalabanan nga US Military bases.
Ginalauman naman nga magataas sang tubtub 10 metros ang balod kadungan sang pagwaswas sang Typhoon Hinnamnor. Samtang,… klanselado ang mga flight sang eroplano sa southern Japan kadungan sang paglabay sang Typhoon Hinnamnor.
Sa report ni Bombo correspondent Josel Palma nagikan sa Yokohama, Japan, ginkansela sang Japan Airlines ang byahe sang ila nga mga eroplano pasulod kag pagwa sa Okinawa.
Ginpahayag man sang All Nippon Airways Incorporated nga walo ka flights ang kanselado tubtub Huwebes bangud sa malain nga panahon, kag mahimo nga magapadayon ang weather disturbance.
Suno kay Palma, nagaguom na ang kahawaan kag nagapanalithi na samtang nagahilapit ang bagyo.
Bangud naforecast nga strongest typhoon ang Bagyo Hinnamnor, naghanda na ang gobyerno sa damage sang bagyo kag naghanda naman sang aid sa mga pumuluyo nga maapektuhan.
Ginpanugyanan man ang mga pumuluyo sa higad sang dagat nga mag-evacuate sang temprano bangud ginapaabot nga magataas sang 10 metros ang balod.
Sang damlag lang, naglunsyar ang Japan government sang proyekto nga pagtukod sang wall sa higad sang dagat apang malip-ot pa lang ang napatindog.
Suno kay Palma, nagabaha man sa Japan kun madamol ang pag-ulan gani ginpaalerto ang mga pumuluyo sa posible nga pag-awas sang suba kag pagluntad sang landslide.
Overhead man ang linya sang kuryente sa Japan gani may tendency nga matumba ang mga poste kun tuman kakusog ang hangin.
Tuman naman ang preparasyon sang gobyerno kun sa diin handa na ang Self Defense Force nga magarescue sa apektado nga mga residente.
