Ginapahayag sang mga residente nga nag-evacuate gikan sa Taal Volcano sa Batangas nga nagakahangawa ang mga ini sa ila nabilin nga palangabuhian kag propiedad.
Suno sa residente nga ginkilala kay Juliana, luyag sini nga magpuyo na sa iban nga lugar bangod nabudlayan na ini sa pag-evacuate sa tion nga maglupok ang bulkan.
Pahayag sini nga nagpromisa ang ila nga municipal government nga may igatukod nga housing program sang naglupok ang bulkan sang 2020.
Apang, isa si Juliana sa mga wala nakabatun sang balay.
Dugang pa sini nga tubtob sa karun nga liwat naman nga naglupok ang bulkan, wala gihapon natuman ang promisa.
Samtang ginpakigbahin naman ni Guadalupe, isa man sa mga nag-evacuate nga residente nga nabudlayan ini sa iya panginahanglanon pinansyal bangod ang nabilin sini nga P2,500 ang gingamit na sini sa pagbakal sang ingredients sa iya nga food business.
Sang mag-alburuto ang Taal sang Sabado, napilitan naman si Guadalupe nga bayaan ang iya nga mga niluto.
Dugang pa sini nga bisan magpauli pa ini agud magbaligya, wala man gihapon sang pulos bangod wala na sang bumalakal.
Kaangay man ang kabudlayan sang courier service rider nga si Romualdo bangod siya ang nagadeliver sang mga parcel sa sulod sang seven-kilometer danger zone sang bulkan.
Apisar nga ginahatag nalang ang mga pagkaon sa evacuation centers, nagakahangawa naman si Agoncillo Mayor Daniel Reyes nga indi nila masarangan nga pakaunon ang 2,000 ka mga pumuluyo sa mga centers.
Gani nagapangayo ini sang bulig sa mga non-government irganizations (NGOs) ukon sa Provincial kag National Government nga mahatagan ang mga ini sang community kitchen.
Santo sa Philippine Institute of Volcanology and Seismology (PHIVOLCS), magadangat pa sa duha ka semana antes makabalik ang mga pumuluyo sa ila nga mga balay bangod ang Taal Volcano ang magapabilin sa idalum sang Alert Level 2 sa sulod sang duha ka semana.
Ginabanta naman sang Batangas Provincial Disaster Risk Reduction and Management Office nga kapin 4,000 ka mga indibidwal ang gin-evacuate bangod sa aktibidad sang Taal Volcano.
Magluwas sa banwa sang Agoncillo kag Laurel, nga yara sa sulod sang seven-kilometer danger zone, pila ka mga residente ang boluntaryo nga nag-evacuate gikan sa banwa sang Balete, Talisay kag Cuenca.
