Ginabasol sang mga residente sa Purok Encarnacion, Barangay Mansilingan ang pagbaha sa ila nga lugar kahapon, nga bangod sa pagtampok sang sapa sa gintukodan sang isa ka Construction Firm sang kilala nga negosyante.
Suno sa residente sa lugar nga si Evelyn Montoyo, sadto wala ginabaha ang ila lugar apang sumugod lang sang gintukod ang Silver Dragon Construction Company sang negosyante nga si Jerry Sy sa ila Barangay, nag-umpisa naman ang pagbaha sang Marso tinalikdan nga tuig.
Nahibaluan nga bangod sa mga pag-ulan kahapon sang aga, madasig man nga nagsaka ang tubig-baha kun sa diin madamo nga mga pamalay ang apektado apisar nga minutos lang nga nagdugay ang pag-ulan.
Suno kay Montoyo, ini bangod gintambakan ni Sy ang anay Sapa nga nagaserbe catch basin sang ulan sa ila Purok.
Pahayag sini nga nagapanindugan ang negosyante nga wala sang Sapa nga nalakip sa titulo sang duta nga iya nabakal, apang panindugan ni Montoyo nga may taytay sa lugar nga nagapamatuod sini.
Pahayag sang tagreklamo nga wala sang rasun nga magtukod sang taytay kun wala sang sapa sa purok.
Dugang pa sini nga nagbutang pa sang riprap ang Construction Firm kun sa diin ang tubig nga gikan sa ila ang kompanya ginapailig padulong sa purok.
Suno kay Montoyo, gintugyanan ini ni Bacolod City Vice Mayor El Cid Familiaran nga magdihon sang petition letter nga papirmahan sini sa mga pumuluyo, kag ini ang iya nga napasa na sa Mayor’s Office kag kay Councilor Karl Lopez nga amo ang Chairman on Environment sadtong Marso.
Ginakasubo man sini nga sang ginpasaka nila sa Punong Barangay nga si Rodolfo Pico ang reklamo, ginsabat lang ang mga ini nga wala na siya sang mahimo bangod indi masarangan sang Barangay nga pondohan ang problema.
