Nagalaom ang mga residente sa St. Benilde Homes sa Barangay Mansilingan, ciudad sang Bacolod nga mapaathagan sila sang developer bangud isa na ka semana nga wala sila sang tubig.
Sa interview sang Bombo Radyo kay Jun Saile, miyembro sang Board sang Home Owners Association sang St. Benilde Homes, wala sang nagatubod sa gripo gani nagapangita sila sang iban nga sources sang tubig kaangay sang pagbakal sa water refilling station.
Suno diri, ang tubig kabuhi, gani tuman kadako nga problema nga wala sila sang tubig.
Suno sa pila ka mga residente, wala gid nagpadulong sa subdivision ang developer nga Buglas Estate Development & Construction Corporation agud nga magpaathag kun ano ang problema.
Suno kay Saile, masobra 100 ka pamilya ang nagaistar sa subdivision gani ginatos ka indibidwal ang apektado.
Halin pa sang tinalikdan nga tuig ang ila problema nga on and off ang supply sang tubig kun sa diin may nagasulod nga water tanker kag nagadistribute sang tubig, apang sang tinalikdan nga semana, nadula na gid ang water supply.
Suno diri, kuntani kadtuan man sila sang tiglawas sang developer agud nga makapaathag kun ngaa nga gin-utod ang supply sang tubig agud nga sila ang maklaruhan.
Suno sa iya, wala ini sang arrears sa tubig sa subdivision gani nagademand sila sang consistent nga water supply.
Suno sa tiglawas sang developer, may technical nga problema sa water system apang walasila ginpaathagan sang maayo bisan may constant communication sa developer ang presidente sang home owners association.
Bangud wala sang tubig, mansig pangita ang mga pumuluyo sang mabaklan apang tuman ini kadako nga gasto bangud mahal man ang purified water agud nga ipanglaba, gamiton sa pagluto kag ipaligo.
