WASHINGTON DC—Nagapanic buying na ang mga residente sa Washington D.C. tatlo ka adlaw antes ang inagurasyon ni President-elect Joe Biden, bilang pagpanghanda sa posible nga violent protests sa Enero 20.
Sa interview sang Bombo Radyo kay Athanasius Francis C. Catalan, Bombo International correspondent sa Washington D.C., ginpahayag sini nga masako na ang tanan sa pagbakal sang mga pagkaon kag tubig bilang pagpanghanda panaglitan nga may yara sang matabo nga hublag-protesta.
Yara sa 25 mil ka mga national guards men ang naka-deploy karon sa palibot sang Capitol Hill agud magbantay sang seguridad.
Suno kay Catalan, hugot ang seguridad nga ginapatuman sa mga nagasulod malapit sa US Capitol building, national mall kag sa mga kaiping nga lugar.
Dugang pa sini nga madamo sang mga Trump supporters nagikan sa iban nga estado ang yara sa Washington D.C. sa karon.
Una na nga nagpang-abiso ang Federal officials sa posible nga violent protests sa tanan nga 50 state capitals kag sa US Capitol.
Ginpanugyanan naman ni D.C. Mayor Muriel Bowser ang mga Amerikano nga indi na magkadto sa capital para sa inagurasyon bangud sa ginalauman nga protesta kag kahangawa dala sang COVID-19.
