Indi na kinahanglan sang mga residente sang Bacolod ang Home Quarantine Pass sumugod subong nga Mayo 16, santo sa ginpagwa nga Executive Order no. 35 sang alkalde sang ciudad kadungan sang pagsugod man sang general community quarantine.
Sa interview sang Bombo Radyo Bacolod kay Mayor Evelio “Bing” Leonardia, ginpahayag sini nga bangud sa mga reklamo sang mga pumuluyo, naghinun-anon ini sa mga opisyales sang syudad kag nadesisyunan nga pamatian man ang ginahingyo sang mga pumuluyo apisar pa nga may yara sang ginhambal si House Speaker Atty. Harry Roque nga may yara sang otoridad ang alkalde sa paggamit sang HQP.
Apang nagpanugyan man ini sa mga pumuluyo nga indi pag-ihaboy ang HQP bangud mahimo ini nga magamit liwat.
Suno diri, nakadepende pa sa obserbasyon sang mga opisyales ang kahimtangan sang ciudad sa idalom sang General Community Quarantine (GCQ).
Wala naman sang patigayunon nga Sunday lockdown apang hinyuon sini nga ang mga tawo sa probinsya ang indi makasulod sa ciudad.
Samtang magabukas naman ang malls apang ipatuman ang mga preventive measures batok sa Covid-19 santo sa ginpagwa nga Executive order sang alkalde sang ciudad kaangot sa General Community Quarantine (GCQ).
Suno kay Leonardia, may yara dapat sang thermal scanner ang malls, siguruhon nga may proper disinfections sa pagsulod sa entrance, sa CR kag mga importante nga lugar.
Wala man sang sale ukon marketing events, wala sang wifi kag ang airconditioner ang dapat 26 lamang ang temperatura kag ang mga restaurants ang dapat take out lamang.
Ginpahayag man sini nga padayon ang pagpatuman sang liquor ban sa ciudad.
