Nagbalik na sa tagsa ka mga balay sini suno sa pinuno sang 303rd Infantry Brigade ang mga nagevacuate nga mga residente sang Sitio Namunduan, Brgy Cambudlas, Bindoy, Negros Oriental matapos ang nagluntad nga engkwentro sa tunga sang teroristang New People’s Army kag tropa sang gobyerno sadtong alas 04:05 sang hapon Abril 30, 2020.
Sa interview sang Bombo Radyo Bacolod kay Colonel Inocencio Pasaporte, ginpahayag sini nga gin-assist sang Philippine National Police, 94th Infantry Batallion sang Philippine Army, Barangay Officials agud makabalik sa mga panimalay sini.
Temporaryo man nga nagtinir ang mga pumuluyo nga nabug-usan sang 60 ka households sa Bindoy Central School sang ang mga ini ang nagevacuate bangud sa kahangawa man nga balikan sang mga NPA.
Antes pa man nagbalik ang mga pumuluyo ginmanduan niya na ni Pasaporte ang katapo sang 94th IB paagi sa team commander nga magpatigayon sang clearing operations sa lugar bangud nga may nakit an nga agi sang dugo sang mga nagpalagyo nga mga katapo sang NPA agud mahatagan sang medical assistance.
Ginkompirmar man ni Pasaporte nga isa sa tatlo ka napatay ang nagapabilin sa morgue, ang isa nalubong na kag ang isa ang may gusto na kuhaon sang nagapakilala nga himata sini apang padayon pa sa karun nga ginavalidate sang mga kapulisan sa banwa sang Bindoy, Negros Oriental.
Nagapati ini nga dapat mahatagan sang chansa ang katapo sang NPA sa tion nga masapwan ini kag mahatagan sang medical assistance bangud nakahibalo man ini nga pila sang mga miyembro sini ang naintuan lamang agud mag-upod sa mga ini.
Wala man ini nagapati sa rason sang NPA nga ginapabudlayan sang gobyerno ang mga pumuluyo sini sa ginapatuman nga ECQ bilang precautionary measures batok sa COVID-19 kay ang mga ini ang nagapangkilkil man sa mga Social Amelioration Program (SAP) beneficiaries.
