Nag-amat-amat na pauli ang mga residente sang Barangay Singcang Airport nga nag-evacuate kahapon sa gym sang JR Torres Elementary School kadungan sang pagbaha.
Kaina sang aga, may doctor nga naghatag sang check up sa pila ka mga evacuees.
Suno kay Merilyn Jibala, barangay secretary sang Singcang Airport, onse nalang ka pamilya ukon 54 ka individuals ang nabilin sa gym kaina sang aga.
Kahapon, 114 ka pamilya ukon 428 individuals ang nag-evacuate nagikan sa nagkalain-lain nga purok.
Suno diri, nagpauli na kagab-i ang mga pamilya nga nagapuyo sa mga purok nga nagsubside na ang tubig apang ang iban ang nagpabilin pa.
Pinakadako nga damage ang narecord sa Purok Sampaguita Dos kag Purok Mars apang may iban nga mga residente nga wala nag-evacuate kag nagpakamaayo nga magpabilin sa ila balay bisan mataas ang tubig kag kinahanglan nga magtinir sa ila atop.
Ang iban nga mga residente nga wala nag-evacuate ang ginpadulungan sang barangay officials agud nga dul-ungan sang food packs.
May duha naman ka bedridden kahapon apang nagpauli na kagab-i.
Kaina sang aga, ginhatagan na sang instruction ang mga evacuees nga sarang na sila makapauli, apang iban sa mga ini ang nagpanglimpyo pa.
Nakabaton naman sila sang food packs nagikan sa City Disaster Risk Reduction and Management Office samtang ang barangay ang naghanda sang ila nga pagkaon.
Suno sa senior citizen nga si Mercedes Candiasan, 80-anyos kag residente sang Purok Kabulakan 1, Barangay Singcang Airport, naglutaw sa tubig ang tanan nga kagamitan.
Suno diri, malapit sa suba ang ila balay apang wala sang gwaan ang tubig gani nag-amat-amat na saka.
Pagkadugay-dugay, nag-abot na ang rescue team nga nagdala sa ila sa JR Torres Elementary School.
Suno kay Candiasan, ini ang una nga kahigayunan nga sila ang nag-evacuate bangud sang tinalikdan, nagasubside man gilayon ang baha.
Suno naman kay Barangay Kagawad Glenn Burgos sang Barangay Pahanocoy, may nabaton nga donasyon ang mga evacuees sa MG Medalla Integrated School nagikan sa pribado nga indibidwal gani ang iban sa mga ini ang nagbalik sa evacuation center.
Nagnubo naman ang tubig sa Purok Hanapbuhay gani nagalaom ini nga makapauli na ang tanan nga mga residente.
Base sa ila nga data, 10 tubtub 15 ka balay ang naguba sa Purok Hanapbuhay.
