Naghingyo ang mga residente sang Barangay Alijis banwa sang Valladolid sa provincial government sang Negros Occidental nga padasigon ang pagtukod sang taytay nga naguba sang Hunyo 2020.
Ang Alijis bridge ang naguba sang June 26, 2020 matapos ginlatayan sang wing van nga may karga nga soya beans.
Kahapon, pila ka mga residente sang Sitio Pangpang ang nagpadulong sa Bombo Radyo agud hingyuon sa Kapitolyo nga kun mahimo suguran na ang construction.
Suno sa purok chairman sang Sitio Pangpang, Barangay Alijis nga si Danny Rebelleza, kuntani maapadasig ang pagpakaayo sang taytay bangud nga indi ini sa gihapon maagyan sang mga pumuluyo kag indi makagwa ang ila mga produkto.
Suno kay Rebelleza, mas nagadoble ang ila nga gasto bangud magluwas nga ginakarga ang ila produkto sa motorsiklo, kinahanglan pa ini nga magtabok sa suba.
Nagalaom ini nga mapatukod na ang taytay sa mas madali nga panahon bangud nga tuman ang perwisyo sini sa tatlo ka barangay sa amo nga banwa.
