Mga residente sang La Carlota City nga nag-evacuate bangud sa Kanlaon eruption, nakapauli na

Nagpauli na sa ila tagsa ka mga puluy-an ang mga evacuees sang ciudad sang La Carlota, Negros Occidental apisar nga nagapabilin sa alert level 2 ang bulkan Kanlaon.

Suno kay La Carlota City Mayor Rex Jalando-on, masobra sa 260 ka mga indibidwal ukon kapin sa 30 tubtob sa 40 ka pamilya ang gin-evacuate sang naglupok ang bulkan sang Lunes sang gab-i.

Sa karun, ginpahanugutan na ang tanan nga evacuees nga magpauli sa ila tagsa ka mga balay.

Suno sa alkalde, nagnubo naman ang aktibidad sang bulkan, diutay na lamang ang tremor nga namonitor kag napatsekyar na ang water sources sa ciudad nga ini ang safe na nga mainom.

Apang, nagpasalig ang alkalde nga nagapreparar sila kag nagaalerto pananglitan liwat nga mag-aklburuto ang bulkan.