Ginkumpirmar ni Negros Occidental Governor Eugenio Jose “Bong” Lacson nga indi na kinahanglan sang travel pass sa pagkadto sa isa ka probinsya sa sulod sang Western Visayas.
Sa interview sang Bombo Radyo Bacolod kay Lacson, ginpahayag sini nga naghingyo ang mga gobernador sa Panay Island nga buksan na kuntani ang border sang Negros Occidental.
Nahibaluan nga hilway na nga makabiyahe ang mga tawo sa Panay Island.
Apang, gin-athag ni Lacson nga magapabilin sa gihapon ang protocol sang Negros Occidental nga ang maga-abot nga pasahero sa pagbalik sang commercial sea travel sa Hunyo 15 ang dapat magpaidalom sa swab testing.
Suno kay Lacson, wala man sang may nagpamalabag sa iya nga pangabay.
Paathag sini, luyag lamang niya nga proteksyunan ang probinsya kag malikawan nga maglapta ang virus.
Gin-athag man sini nga ang provincial government ang ma-shoulder sang swab test sang mga taga-probinsya samtang ang Bacolod City government naman ang bahala sa mga taga-ciudad.
Nagapangabay man si Lacson sa mga local government units nga kun mahimo, magdonar ang mga ini sang mga test kits agud dugang nga magamit sa molecular laboratory sa Teresita Lopez Jalandoni Provincial Hospital sa ciudad sang Silay.
