Nagdangop sa Bombo Radyo Bacolod ang duha ka representative sang mga retired teacher’s nga wala nakabatun sang nagakadapat nga benefits gikan sa Bago City Teacher’s Federation.
Sa interview sang Bombo Radyo Bacolod kanday Ligaya Jimena kag Elsa Valerio, sila ang may ginabayaran sa kada pagtakop sang School Year antes sila mahatagan sang clearance.
Suno diri, ang koleksyon ang nag-umpisa sadto pang 1990s kag sila ang wala man sang palya sa pagbayad bangod ini ang mandatory.
Sadto, sa budget ginakuha ang hospitalization kag funeral benefits kun may mapatay nga manunudlo, apang sa ulihi, ang budget ang gintalana na lamang bilang benepisyo sa tion nga sila ang magaretiro.
Apang ang mga nagretiro humalin sang 2020 tubtob 2023 ang wala na nakabatun sang ila benepisyo nga kuntani balor P20,000 suno sa mga una nga nakabatun.
Si Jimena ang nagretiro sang 2020 samtang si Valerio ang nagretiro naman sang 2021.
Makapila naman nila nga ginpadulungan ang Bago City Teacher’s Federation, apang pahayag sang mga ini nga sila ang wala sang koleksyon sang pandemic.
Sa ila pagsugilanon sa Federation President nga si Jeffmark Lavilles, ginpahayag sini nga nagbag-o na ang pagsulundan, kag ginhimo na voluntary ang contribution kag indi na mandatory.
Sang ginpamangkot natuhoy sa nakaligad nga mga pondo, panindugan sang presidente nga wala na sang pondo sang siya ang nagpungko.
Nahibaluan nga tatlo ka tuig lamang ang termino sang Federation President kag sa Disyembre, si Lavilles ang paga-islan naman.
Apang ginakabalaka sang mga ini nga sila ang wala sang mabatun, bangod dako ang posibilidad nga indi naman magbayad ang mga manunudlo karun nga voluntary na lamang ang contribution.
Samtang, una naman nga nagpahayag ang DepEd division of Bago City, nga sila ang wala na sang kahilabtanan sa mga lihok sang Bago City Teacher’s Federation.
Suno sa mga ini, sa ulihi mabudlay na ma-atubang si Lavilles, wala na nagaseen sa messenger, kag ini ang indi man maghatag sang contact number.
Pahayag sang duha ka tagreklamo nga isa sa wala nakabatun ang kaingod balay man mismo ni Lavilles, nga nagapaidalum pa sa dialysis.
