Nagpanindugan ang isa ka rider nga ginapalapit lang sa aksidente ang mga motorista bangud sa pagbutang sang barrier sa mga motorsiklo agud masiguro nga may yara sang physical distancing santo sa mando sang national Inter-agency Task Force (IATF).
Sa interview sang Bombo Radyo kay Jay Ezard Pedrosa, team leader sang Philippine Road Sports Confederation, indi siya pabor sa pagbutang sang barrier sa motorsiklo nga kaangay sang backpack bangud sarang nga mapalid ang driver sa tion nga labayan sang dalagko nga mga salakyan bangud ginasalo sini ang hangin.
Sarang man nga mahulog ang angkas sini bangud nakadepende man sa klase sang motorsiklo nga pagabutangan sang barrier.
Ginpahayag man sini nga ang pagbutang sang barrier ang mahimo nga dugang nga galastuhan ilabi na sa kasubong sini nga hustuhan lang sa pagkaon kag gasolina ang budget nila.
Nagpabutyag man ini sang suhestyon nga nga sa baylo sang barrier, magasuksok nalang sang full-face helmet kag jacket bilang proteksyon batok sa coronavirus.
Nagpanawagan man ini sa national Inter-Agency Task Force kag sa gobyerno nga antes pa mag-implementar sang mga pagsulundan, itesting antes igaimplementar agud masiguro nga hilway ini gamiton sang mga natungdan.
Nag-abiso man ini sa mga kasubong niya nga mga motorista nga indi pag-irisgo ang kabuhi sang mga pinalangga sa kabuhi bangud sa sala nga implementasyon sang mga pagsulundan.
