Nagpanawagan ang pinuno sa Bacolod City Disaster Risk Reduction and Management Office nga amat-amat na nga tinluan ang mga sapa kag kanal sa ciudad karun nga nag-umpisa na ang tig-ululan.
Sa interview sang Bombo Radyo Bacolod kay Dr. Anna Maria Laarni Pornan, sila ang nagapatigayon sang dredging sa Mambulok Creek apang ginakatingala sini kun ngaa kaangay nga wala nagakaubos ang basura.
Ginalantaw sini ang posibilidad nga may-ara sang mga hungod nga nagahaboy sa sapa.
Madasig naman ang pagtipon sang basura bangod nagasulod ang mga ini sa Mambuloc Creek sa tion sang high tide.
Plano sang CDRRMO nga magstandby sang garbage truck sa nasambitan nga water ways kag ginapanugyan man sa mga Barangay sa palibot sini nga magschedule sang area nga iproyekto nga tinluan.
Pahayag ni Pornan nga kalabanan sa nakita nila nga basura amo ang plastic cups, styro cups, mineral water bottle kasubong man sachet sang shampoo kag kape.
Ini ang pangabay sang CDRRMO agud malikawan ang pagsupon sang mga basura sa water ways kag pagluntad sang pagbaha sa pagbubo sang mabaskog nga mga ulan.
Sa pihak nga bahin, bangod ang kada Sabado ang gindeklarar na nga “Kalinisan Day” sang tagsa ka mga Barangay, panugyan ni Pornan nga magluwas sa pagpanilhig sang mga sagbot, mas maayo nga kalakip man sa tinluan ang mga kanal.
