Nagbukas si Vice President Sara Duterte sang mga sattelite offices sa nagkalain-lain nga rehiyon sa pungsod agud makahatag sang immediate services ang Office of the Vice President.
Sa Facebook post, ginpahayag ni Duterte nga sila ang nagbukas sang anum ka mga satellite field offices sa anum ka mga rehiyon sa pungsod sa iya una nga adlaw sa pagka-bise presidente.
Suno sa iya, nahamtang ang nasambit nga mga satellites sa Dagupan (Region 1), Cebu (Region VII), Tacloban (Region VIII), Zamboanga (Region IX), Davao (Region XI), kag Tandag sa Surigao del Sur (Region XIII).
Una na nga nagpatigayon sang transition talks si Duterte kaupod si anay Education Secretary Leonor Briones.
Suno sa Department of Education, isa ka joint farewell kag welcome ceremony ang patigayunon sang Hulyo 4.
Suno kay Duterte, ginalantaw sini ang posibilidad sang full resumption snag face-to-face classes apisar nga yara pa sa state of public health emergency ang pungsod bangud sa COVID-19 pandemic.
Ginpahayag man sang bise-presidente nga siya ang ginmanduan ni President Ferdinand “Bongbong” Marcos Jr. nga ireview ang K to 12 program.
