Nagapasalamat ang school head sang Casipungan Elementary School sa Barangay Carabalan, Himamaylan City – isa sa far flung areaa nga sakop sa Department of Education (DepEd) Division of Himamaylan City, Negros Occidental, matapos nga mabaton ang school supplies kag iban pa nga gamit para sa pag-eskwela sang mga estudyante nagikan sa mga nagkalain-lain nga donors, paagi sa Bombo Radyo Bacolod.
Suno kay Sara Jane Barcelona, dako nga bugay ang nabaton nga mga school supplies kag iban pa nga gamit para sa eskwelahan kag ini ang ginapasalamatan gid sini sang dako.
Ginpasalamatan man sini si Commodore Danyl Yap, pinuno sang Coast Guard Auxilliary kag Captain Cristine Pauline Diciano, ang First Female Commander sang Philippine Coastguard Civil Aviation Force.
Nangin emosyonal man si Anatalie Singuillo, isa sa mga manunudlo sa Casipungan Elementary School bangud sa nabaton sini nga bulig.
Suno kay Singuillo, upod sa mga ginikanan kag mga estudyante, nagapasalamat sila sa nabaton nga school supplies, uniform kag sa mga cash nga nabaton nila paagi sa GCash nga ginagamit nila sa feeding program once a week.
Ginpahayag man ni Commodore Danyl Yap, pinuno sang Coast Guard Auxilliary, nga nagasalig ini sa Bombo Radyo gani sa tion nga may yara sang panawagan wala ang mga ini nagapangduha-duha sa pagsabat sa mga panawagan.
Indi lamang passion kundi dedikasyon na sang mga ini ang paghatag sang bulig kaupod sang ila mga counterpart sa Philippine Coastguard kag Philippine Coastguard Civil Aviation Force.
Nagapasalamat man ang Bombo Radyo Bacolod sa mga sponsors kasubong man kay Commodore Danyl Yap, pinuno sang Coast Guard Auxilliary, Coast Guard kag Philippine Coast Guard Civil Aviation Force kasubong man sanday Mr. John Chiong sang TaskForce kasanag kag Mr. Vic Singh nga nagsabat sa pagpanawagan sang school head kag manunudlo sang Casipungan Casipungan Elementary School.
Manunumduman nga ginpakigbahin sang manunudlo sang ang sitwasyon sang nasambit nga buluthuan.
Ang eskwelahan ang yara na sa nabukid nga bahin sang Barangay kag duha ka oras ang biyahe antes makasulod diri.
Mabudlay ang sitwasyon sang mga kabatan sa lugar bangud wala sang kompleto nga uniporme, wala sang school supplies kag wala sang maayo nga pagkaon indi kaangay sa mga yara sa patag.
Dugang pa sini nga iban sa estudyante ang nagagamit nalamang sang plastic bilang suludlan sang gamit bangod wala sang bag.
Reyalidad na sa eskwelahan ang kahimtangan sang mga kabataan nga masami nagabalon nalang sang kararuton, ukon kan-on nga wala sang sud-an kag may iban nga nagasud-an nalang sang chichirya.
Apisar sa sitwasyon, madamo sang mga estudyante nga nagapaninguha gihapon sa pag-eskwela.
Ang buluthuan ang may kabug-usan nga 97 ka mga estudyante kag pito ka regular teachers kag duha ka city paid literacy teachers.
