Magapaidalom liwat sa rapid testing ang mga Overseas Filipino Workers (OFW) kag seafarers nga ginrepatriate sa Negros Occidental kag yara sa karun sa EB Magalona Healing Center bangud wala sila sang rapid test results.
Sa interview sang Bombo Radyo kay Provincial Health Officer Dr. Ernell Tumimbang, ginpahayag sini nga wala sila nakahibalo nga wala sang rapid test results nga dala ang mga OFWs kag seafarers kag quarantine certificate lang ang ginakaptan sang mga ini.
Suno kay Tumimbang, indi ini conclusive kag kinahanglan gid sang physical proof nga negatibo ang mga ini sa rapid test, gani magapatigayon sila liwat.
Kun mahibaluan nga reactive ang mga ini, magapatigayon man sila sang polymerase chain reaction test.
Suno kay Tumimbang, ini agud masiguro ang kahilwayan sang probinsya sa virus bangud kalabanan sa dugang nga mga kaso ang bangud sa mga ginpa-repatriate nga mga Negrenses.
