Nagapati ang political analyst nga wala sang “criminal act” nga nabayolar ang mga Senador angot sa paggwa ni Senator Bato dela Rosa sa Senate Premises.
Madumduman nga ginkumpirmar sang National Bureau of Investigation (NBI) nga ginakabig nila nga “person of interest” si Senador Robin Padilla angot sa pagkadula ni dela Rosa matapos ini naggwa sa Senado sang kaagahon sang Huwebes.
Sa interview sang Bombo Radyo kay Atty Jomax Ortiz, ginpaathag sini nga ang protective custody para kay Bato ang isa ka lehitimo kag indi na responsibilidad sang senado kun boluntaryo nga maggwa ang senador.
Bangud suno diri, indi isa ka detention cell ang senado gani wala sila sang may mahimo kun maggwa si Bato.
Apang suno kay Ortiz, naggwa lang nga wala ginarespeto ni Bato ang Senado bangud mas nakomplikar pa gid ang sitwasyon kasunod sa natabo nga shooting incident sa sulod sang Senado.
Ginpahayag man sini nga sigurado siya nga indi na makatambong pa si Bato sa natalana na pag-convene sang Senado bilang impeachment court sa Lunes bangud mahimo dakpon siya sang NBI sa bisan ano nga oras apisar nga wala na sang International Criminal Police Organization (Interpol).
