Gin-athag sang pinuno sang Volcano Monitoring and Eruption Prediction Division sang Philippine Institute of Volcanology and Seismology ang mga ginabantayan nga mga senyales sa Bulkan Kanlaon sa posibilidad sang liwat nga maglupok.
Suno kay Ma. Antonia Bornas, ang mga aktibidad sa karun sang nasambit nga bulkan ang indi pa basehan agud nga ipasaka ang Alert Level sini kag indi man ini basehan sang liwat nga paglupok.
Suno kay Bornas, ang aktibidad sang Bulkan Kanlaon nga pagtaas kag pagnubo sang ash emissions kag ginabuga nga sulfur dioxide ang makabig nga indi unusual.
Humalin sang Enero 26 tubtob Enero 30 may namonitor nga pagnubo sang ash emission kaangay sang Enero 26 nga 2,364 tons kada adlaw kag sang Enero 28 nga 1,691 tons, apang nagsaka naman ang tonelada sa mga masunod nga inadlaw.
Samtang 5,000 tons ang average sulfur emission sang Bulkan Kanlaon santo sa monitoring sang PHIVOLCS humalin sang June 3 2024 antes ang paglupok sini.
Suno kay Bornas, mahimo lamang mapasaka ang alert level sang nasambit nga bulkan kun may nakita nga pagsipa sang tanan nga monitoring parameters nga ginalakipan sang rapid inflation nga madetect sang mga stations sang PHIVOLCS, may yara sang nagasunod-sunod nga linog, kag kun ang sulfur dioxide emissions ang mataas apang gulpyada lamang nga madula kaangay lamang sang eksperyensya sang mga ini sa Mt Pinatubo sadto antes naglupok sang 1991.
Suno diri, madamo sang ginabasehan ang PHIVOLCS sa pagpasaka sang alert level sang isa ka bulkan kag indi lang ang pagnubo sang Sulfur dioxide emission.
Sa karon padayon ang monitoring sa bulkan Kanlaon kag ini ang naga pabilin sa alert level 3.
